新蒲崗英記美點小食

13741132_1780311495525598_653973720_n

心血來潮去左新蒲崗搵食,誤打誤撞見到呢間老店仲要幾多人食就入去試下先!可能我地得兩條友叫到成枱野,又可能撞正同老闆娘同枱開飯,之後老闆娘就講左好多往事俾我地聽。

由最先響元朗做,跟住搬過幾次,跟過唔同人學師,賣嘅野亦都轉過幾次,過左幾十年到而家每樣野都好有質素,仲攞埋米芝蓮(呢個真係估你唔到),雲吞餡加幾多肥豬肉,麵餅先過幾多次鹼等等,就係靠經驗同閱歷。

六十年代撈麵,講白啲其實就係豬油撈麵,老闆娘話諗過得意啲名吸引後生仔好奇心,同埋驚人地聽到豬油就怕肥唔敢叫。呢度有個規矩係六十年代撈麵唔可以加餸,點解呢,如果加牛腩就俾腩汁蓋過,加雲吞又會俾湯汁沖淡,所以單食就最有豬油香,而且麵都煮得唔差。

老闆娘仲私人醒左碟豬油渣俾我地送麵,一食之下嘩真係不得了,贏哂深水埗啲乜乜油渣麵,炸到將完全表達鬆脆呢兩個字嘅真意,一咬落去,脆得黎又好鬆化,然後啲油汁咇出黎,果下簡直係天間極品!

淨豬手,細碟都有成七八舊,老闆娘都坦言今晚豬手麻麻地,燜得唔夠腍,就係鐘意佢夠直腸直肚。雖然唔算好腍但都幾入味,個汁底都幾香,六十蚊碟係貴左少少囉。

另外店員推介嘅雲吞水餃雙併,兩隻都好好食,可能一路食一路睇住個店員姐姐響度包餡,果種手工係幾有心思的,兩種我就比較喜歡水餃,入面有木耳食落爽爽地,而且一定要飲埋個湯,好甜好正!

由坐底店員姐姐推介食物,話你知有餐平過你分開點,又問你啲野好唔好食,一路講歷史時仲不停有好多街坊黎打招呼,仲有好開胃好爽口可以免費任食嘅自家醃製酸蘿蔔,響呢度食到嘅除左係店家幾十年嘅經驗同技術,仲有陣人情味添!

P.S.好想食到老闆以前賣的無敵煲仔飯,老闆娘話而家只會煮俾屋企人食咋><!

Posted by:

Marco

Related articles

Back to Top