西環新派點心:臻

untitled

前排響西環食左間新開點心舖,主打新派點心,雖然價錢有D貴,但食落真係不得了,樣樣野都唔差,賣樣靚得黎仲要唔係得個樣!

超可愛的豬仔包,其實入面係叉燒包,雖然味道唔算特別,不過勝在個皮唔厚唔會好滯,如果餡多D仲好

呢個係流沙包黎,雖然冇豬仔包咁可愛,但味道上好好多,流沙奶皇個量超多,同埋好鐘意佢多得黎唔會好膩,蛋黃味唔重,食起黎唔會滯,好正

第一次學人玩下嘔奶包,整得麻麻地tim XD

超靚的金魚仔,可能要做花紋所以覺得個皮有D厚,同埋食落好爽口同好清,建議第一個食呢樣先

雖然唔係寵物系列但好好味,其實金箔同墨汁感覺唔係好關事,但蝦餃入面加芝士又好夾,同埋呢隻夠皮薄餡滿,必食之選

叫鵝肝醬春卷但食落又唔多覺有鵝肝醬味,不過新鮮炸起好香口,個皮脆得黎又唔會硬

好似隻飛碟的水煎包,好香好似生煎包咁,但個包皮更軟身,而且入面仲啖啖肉添

呢個龍蝦湯餃係當晚唯一有D小失望,其實隻餃完全冇問題,薄餃皮包住成隻大蝦啖啖肉,不過個龍蝦湯就出出地事,一啖飲落去係苦的,初時以為係煲燶左,之後問老闆佢就話係用龍蝦頭同殻餚出黎所以咁濃味,但都幫我地再整過。

本來已經食左一隻就以為整過個湯,點知拎左碟新ge出黎,變相送多左隻俾我,服務態度一流呢,至於第二次D湯老闆話加左多D忌廉,雖然飲落依然係有D苦味但接受到,而且經佢一講又真係響D苦味入面嗒到D蝦頭味。

除左龍蝦湯仲有呢個黑松露菇菇湯~雖然響點心舖飲西湯好似怪怪,但真係好鐘意黑松露陣香味,而且飲落有D碎菇蓉ge質感好正

超可愛個名又好有詩意的一籠相思,食落似雞仔酥咁,入面係酸酸甜甜的果味蓮蓉,而且幾多餡下,又係必食之選

佢仲會跟埋個雀籠俾你影相,食時先再揭開,中間個窿睇得出係自己人手剪開再油金油,好有心機

最後叫多個招牌蒸飯,本來揀黑毛豬但轉左安格斯之後又售完罄,最後就揀左鱈魚,點知錯有錯著,鱈魚超滑,魚汁滲落D飯度超好味

最後係甜品,紫薯蓉同紅豆糕,賣相好靚但兩樣我都唔太合口味,不過因為係送的就算啦XD

 

Posted by:

Marco

Related articles

Back to Top